Submitted by daktawr on Fri, 02/10/2017 - 15:15
Lung na

Lung na han tih tawp hi damdawi.in website chhiartute chuan lunga natna chi hrang hrang awmte a hlawma sawina a ni tih han hre hmasa phawt mai i la. Lung natna lar ber chu Coronary Heart Disease (CAD) hi niin, lunga thisen petu thisen dawt chhung lamah balkhawn lo betin, chu chuan thisen dawt a tikhawng a, a tizim bawk a, lung tihrawlin thisen duhkhawp a hmu thei lo ta țhin a ni.

Hetia balkhawn vanga thisen dawt lo khawng leh lo zim ta hi atherosclerosis tih a ni a. He balkhawn kan tih mai hi thau mawm leh cholesterol leh thil chi hrang hrang inbelhbawmin a siam a ni. Lung tihrawla thisen lut a titlem a, thisen a luh thlem chuan oxygen lut a tlem a, lung na leh lungphu chawl hial pawh a thlen thei ta țhin a ni.

A inven dan

  • Eitur hrisel tak ei tur. Eitur hrisel tak ei hian lung na tur leh lung na zual tur nasa takin a veng thei a ni. Thlai leh thei tharlam ei tam tum ang che.
  • Rihzawng hrisel takin vawng rawh. Thau lutuk leh rih lutuk hian lung na neih theihna a titam hle.
  • Insawizawi uar la, insawizawi hian rihzawng a tihrisel a, cholesterol leh blood pressure a tihniam a ni. Kar khatah darkar 2 leh a chanve tal insawizawi țhin ang che.
  • Mei zu suh. Meizial zuk hian lung na neih theihna a tisang hle a ni. Chuvangin, i la zu lo a nih chuan, zu suh. I lo zu tawh a nih pawhin sim tum rawh, kan lo pui thei che, eClinic-ah hian min lo bepawp la.
  • Zu in chin tawk nei rawh. Zu in tam lutuk hian thisen sang a thlen thei.

Ngaihtuah zui atan

  1. Lung na hi mipa zinga thihna thlentu tam berte zinga mi a ni.
  2. Lung na (CHD) vanga thi zinga a zahve aia tam hian a hmain lung na an vei ngai lo. Lungphu chawl thut kan tih ang kha a nih chu.
  3. Lung na insawiselna tur nei lo mah la, lung na thei dinhmunah i ding reng thei tho a ni.