Theiherawt leh kal na

Submitted by daktawr on Fri, 02/09/2018 - 19:03
Theiherawt chemical structure

Theiherawt hi kan hre lar viau mai a, a thatna sawi tur tam tak a awm a, zirchianna thenkhat leh lehkhabu dangte rawna a thatnate kan ziahna pawh Hriselna chanchinbu lamah a chhuak tawh a. Khawvel pum huap ang pawha thei ei nasat niin, a bik takin khawchhak lam ramah te chuan an uar em em bik a ni.

Thei te, thlai damdawi te pawh hi thatna nei mah se, a chang chuan chu an thatna tak chu mi thenkhat tana tur hlauhawm tak a ni thei bawk tih hi hriat reng tur a ni a. Chumi a nih avang chuan hriselna lam kaihhnawih, a bik takin damdawi chungchang thuziakah chuan vaukhanna (warning) dah tel thin niin, 'he thuziak hi mahnia damdawi inchawhchawpna atan leh daktawr rawn loh phahna tur a ni lo a, damdawi i ei dawnin daktawr chawh chauh ei ang che' tia ziah a ni fo thin reng a ni.

Theiherawt rah hi Carambola tiin khawvel huapah chuan sawi a ni a, a kung hi Averrhoa carambola tiin scientific name pek a ni a. Taksa mamawh chaw tha chi hrang hrang Vitamin A, B, C, Iron, Calcium a pai a, thau-chhia - cholesterol a pai ve loh avangin lung natna nei tan pawh ei a pawi lo thei a. Chuti khawpa thei hrisel chu a nih laiin, a chemical pai tel pakhat erawh chuan daktawr te beng a verh hle mai a.

Research paper engemaw zat, theih ang angin ka han fawmkhawm a. Theiherawt rahin a pai tel chemical pakhat caramboxin chu kal na, kal leh zun kawng lam chiang lote tana tur hlauhawm tak a lo ni reng mai a. He chemical hi kawng lehlamah chuan antioxidant an tih mai, taksaa chemical chhia leh tla-hlang awm te paihchhuak thei niin, zunthlum enkawlna atan pawh beiseiawm tak a ni a. Hemi bakah hian chemical dang pawh mi hrisel pangngaiin kan zun chhuah vek theih, mahse kal lama harsatna nei te'n an zun chhuah sen loh avanga taksaa harsatna thlen leh thei si a awm bawk a ni. Hemi chungchang hi phek engemaw zah ziah tur a awm a, tun tumah chuan heti chin hi duhtawk mai i la.

Theiherawt ei nasat vanga natna awm thei, research lama lo lang te chu: irhfiak, kala lungte awm, rilru buai leh kaih te a awm thei a ni. Hetiang lama harsatna nei te pawhin insum a tha khawp ang.

Engpawhnise, eitur reng reng hian thatna leh that lohna a nei vek mai a, ei chin tawk neih a ngai vek mai. Kal na i neih ngai lem loh chuan ei a hlauhawmna a awm em em chuang lo a, ni tinin mi maktaduaih engemaw zatin theiherawt hi khawvel hmun hrang hrangah chaw tha atan an ei reng a ni.