Tun hnai maiah khan kum 10 liam daih tawha CIA lamin an lehkha ‘thuhrûk’ an puanzar tawh chu a rawn lar thar leh a. Hetah leh hetah hian chhiar theihin a awm a. Hriatna tizautu atan a mawlmang thei ang berin han sawifiah kan tum dawn a ni.
Thuhma: Khawi aṭanga lo kal nge?
He thu kan rawn tarlan tur hi kum 1950 daih tawh khan America ram intelligence agency lian, CIA te chuan “lehkha thuhrûk” (confidential document) angin an lo vawng ṭha a. Hei hi Soviet Union (tuna Russia) lam scientist thiam tak, Prof. V. V. Alpatov-a zirchianna lehkhabu ‘Priroda’ (Nature) magazine-a an tihchhuah a ni. He zirchianna paper hi mipui nawlpui chhiar chi leh hriatthiam theih tura ziah a ni lo a, thiamna sang tak nei doctor leh mithiamte tana scientific/medical paper a ni a. Mahse, a tlangpui leh a thil hmuhchhuah pawimawh zualte mipuiin kan lo hriatthiam ve theihna’n awlsam zâwkin hetiang hian kan rawn tarlang a ni.
Cancer leh Rulhut Nundan Inanna
He zirchiannaah hian Prof. Alpatov-a chuan kan taksa chhunga rulhût leh rannung hlauhawm awm ṭhin (endoparasites) te leh cancer bawk ṭha lo (malignant tumors) te hian kan taksaah khawsak phung inang tak an nei tih a tarlang a. Hei vang hian hun hmasa lam aṭang tawh khan, “Cancer hi parasite nungdan nen hian a inang em ni?” tih ngaihdan a lo piang hial tawh a ni.
An inanna langsar zualte chu hengte hi a ni:
- Oxygen tel lova khawsak (Anaerobic metabolism): Kan ril banga awm thin rulhûtte hi oxygen tam lohna hmunah an inthlahpungin an nung thei a. Chutiang chiah chuan cancer bawk (tumors) te pawh hi oxygen tlemna hmunah an ṭhang lianin an nung thei bawk a ni. Hei hi an inanna lian tak pakhat a ni.
- Chakna (Energy) khâwl khâwm dan: Heng rulhûtte hian an taksaah chakna min petu thlum lam chi ‘glycogen’ tam tak an kawl khawm (store) ṭhin a. Mak tak maiin, cancer bawk te pawh hian chu ‘glycogen’ bawk chu an cell chhungah tam tak an khâwl khâwm ve thei bawk a ni.
- Damdawi hnathawh dan a inang: Mithiamte’n damdawi (chemical) chi hrang hrang an enchhin a. Entirna’n, kum 1938-a an siamchhuah damdawi ‘Myracyl D’ leh ‘Guanozolo’ an tihte chuan rulhût leh parasite-te inthlahpunna a dal (block) theih rualin, cancer cell inthlahpunna pawh a dal thei tih an hmu chhuak a ni. Rulhût thahna’na ṭha damdawiin cancer bawk a do tel thei hi thil mak tak a ni.
- Taksa Cell-in a dawnsawn dan danglam: Zirchianna thûk zâwk (optical inversion of receptors) an tihah chuan, heng cancer cell leh rulhut cell-te hian damdawi (chemical molecules) ṭhenkhat an lo dawnsawn dan hi a inang hle a. Kan taksa peng hrisel pangngai cell-te nena an lo dawnsawn dan chu a letling thawk (opposite reaction) a ni. Hei hian cancer cell leh rulhûtte hian thuruk leh inanna thûk tak an nei tih a finfiah a ni.
Tlangkawmna
He CIA document hlui leh pawimawh takin a tarlan tum ber chu — Cancer natna hi mihring taksaa cell ṭha lo inthlahpung ni mah se, a khawsak phung, a thâwk lâk dan, leh taksaa a inrelbawl dan hi kan taksaa rannung tenau (rulhût/parasite) lo lût te nen hian inanna mak tak an nei a ni tih hi a ni. Hei vang hian cancer zungzam awmdan hriatthiamna’n parasite zirchian hi a lo ṭangkai hle a lo ni. Tin, damdawi lama thiamna leh zirchianna te hetia thup theih a awm emaw, thup a ni hian mipui nawlpuiah sawrkar rintawk lohna a neihtir a, hemi chauh lo pawh hi lehkha thuhruk tam tak la awm thei a nih rinna social media lamah chuan an tarlang nasa hle.