Mizote fiamthu titaka kan duhthusam kan sawi fo chu ‘ka hausak hunah chuan chaw ei apiangin sa ka hmeh ang’ tih te, ‘ka hausak hunah chuan thingpui thlum hlir ka in ang’ tih te a ni. Fiamthu mah ni se, kan rilru chhungrila kan duhthusam chu a nih hmel, hmuihmer leh thlum lamah hian kan insum lo hlawm hle a, hei hi zunthlum kan vei chhan tam ber pawh a ni.
Bible thu aṭanga han chhui let pawh hian ‘thlan tla zawih zawiha thawk a, ei hmu tur’ kan nihzia hi kan hriat thar leh a ṭha awm e. Kan taksain a mamawh aia tam eitur ṭha (thlum leh mawm) kan ei a, insum kar lek loin kan kain a duh chhung chu kan ei mai ṭhin a ni. Mahni inthiamchawpna atan insum a harzia lah chu kan han sawi thiam ropui mai si a! A tawpah natna ṭha lo tak tak kan han vei meuh chuan insum deuha kan awm a ngai leh tho ṭhin a ni.
Kan taksaah hian thlum a tam lutuk emaw, engemaw vanga pumpuibawhin insulin a pekchhuah ṭhin a lo tlem emaw, a pekchhuah hleihtheih lohin emaw, thisena glucose awm chu paiṭawihtu a lo awm tam tawk lo a, thisena thlum tam tak awm chu kalin a theihtawpin lo paihchhuah a tum a, zunah te thlengin glucose a lo awm ta a, chu chu Mizo pawhin a hming kan puttir chhan zunthlum natna lo awm dan chu a ni.
Miin zunthlum a vei tawh chuan, a vei hma daih aṭangin a nunphungah thil ṭha lo tam tak tihṭhana a lo neih tawh, han bansan mai har a tih em em mai a nei tawh tlangpui a. Eitur thlum ṭha ṭha leh mawm ṭha ṭha a ei ṭhin avangin thil thlum tak emaw, mawm tak emaw ni lo chu a kaah a da duap tawh ṭhin a. Kan lei hi khawi fin har tak mai ni mah se la, engemaw chen chu a zirtir theih a. Thil mawm leh thlum hre em em mai tura kan inthlahdah a nih chuan kan hmabak chu a eng vak lo a ni tih ngaihtuah reng chungin, mawm lutuk leh thlum lutuk ei tam loh tum hram hram tur a ni.
Pi leh pute aṭangin Mizote hi thingpui in nasa tak mai kan ni a. Pi leh pute tih loh ang takin kan thingpui inah chini kan han telh a. Thingpui tui kan han sawi pawh chini tel tam tam a ni mai. A changkang lo hle a ni! Tin, ṭhalai zingah thingpui in duh lo an awm nual a, mahse he’ng zingah pawh hian cold/soft drink kan han tih mai chi, soda/carbonated drinks in nasa em em mai an awm leh zel a. Soft drinks-ah hian chini an telh tam em em a, he’ng drink-a an telh zat hi kan thingpui inah hian han telh ve ta i la chu kan luak bawrh bawrh thei ang. Mahse soft drinks kan in hian kan luak lem si lohna chhan chu an thil telh tam tak hian luak nghal tur a ven vang a ni.
Insum theihna hi thlarau rah a ni tih hre rengin, Pathian temple thianghlim, kan taksa hi, zu leh ruihtheih thil lakah chauh ni lo, ei puar lutukna lakah pawh i veng tlat ang u.