Ayushman Bharat Mizoram

DIPR: Chief Minister Pu Lal Thanhawla chuan nimin khan khawvela Health Care Scheme lian ber Ayushman Bharat – Pradhan Mantri Jan Arogya Yojana (AB-PMJAY) chu Mizorama hman turin a hawng.

AB-PMJAY scheme thar hnuaiah hian chhungkua pakhatin kum khatah ₹ 5,00,000 (Cheng nuai nga) thleng damdawiina an inenkawlna senso an bill thei dawn tawh a. He scheme hi Mizoramah October ni 1, 2018 aṭanga hman theih nghal tura ruahmanna kalpui mek a ni. Mizoram State Health Care Society, Department of Health & Family Welfare in a keng kawh ang.

AB-PMJAY scheme hnuaia inziaklut chhungkuate chuan kum khatah damdawi-ina inenkawl nan ₹ 5,00,000 (Cheng nuai nga) thleng an bill/ hmang thei dawn a. Natna chi hrang hrang 1390 chuang inenkawl theihna tur leh a zat (rate) bituk sa (package rate) a awm dawn a. Chuvangin ₹ 5,00,000 (Cheng nuai nga) bill theih tih ni mahse, natna enkawlna rate (package rate) aia tam a hman theih chuang loh a ni. Heng package rate hian investigation man, damdawi man, in zai senso, chaw, Nursing senso, Doctor Visit senso, etc. a huam tel ang.

AB-PMJAY hmang theitu te chu (i) Socio Economic Caste Census) 2011 Census List-a tel chhungkua te, (ii) RSBY Smart Card hmang mek chhungkuate leh (iii) Mizoram Sawrkar hmalaknain Mizoram Health Care a inziak lut tawh sa chhungkuate leh kumin October chhung a inziak lutte an ni.

RSBY leh Health Care hnuaia chhungkaw member tam lam zat limit (5 chin) awm ṭhin chu tihtawp a ni a, chumi awmzia chu chhungkua member eng zata tam pawh ni se la then hran (split) ngai loin chhungkaw khatah an tel vek thei tawh a ni.

Damdawi ina inenkawlna atan hian pawisa hman ngai loin (cashless) a inenkawl theih tawh dawn a. He Scheme tharah hian Enrollment hranpa a ngai tawh lo a, Enrollment Fee hranpa pawh chawi a ngai tawh lo ang. Nimahsela, APL tan erawh chuan kumin October chhung hian la in register lote tan hun hawn a ni dawn a, Register man chu ₹ 1500 (Sangkhat zanga) a ni thung ang. Mahni bial Sub-Centre ṭheuhah ngaihven tur a ni. In register tawh sa tan tihnawn a ngai lo ang.

He scheme hi sawrkar laipuia Ministry of Health & Family Welfare scheme kal lai mek Rashtriya Swasthya Bime Yojana (RSBY) thlak thlengna tura duan chhuah a ni.

He scheme-ah hian in chhungkua in tel ve leh tel ve loh chu a hnuaia link-ah hian i en thei a ni: https://mera.pmjay.gov.in/search/login