Ningani (28.1.2021) zan khan Cancer Foundation of India leh Mizoram State Cancer Institute ṭangkawp huaihawtin, khawvel hmun hrang hranga Cancer lam mithiamte nen, ‘Chhul hmawr cancer ûmbona tura hmalak dan’ tih thupui hmangin webinar buatsaih a ni a, Mizoram state chhunga hmeichhiate chhul hmawr cancer laka an him theihna tura anmahni puih leh kaihhruaihna dan tur thute sawi lan a ni.
He huna thusawitu, Dr. Eric Zomawia, Mission Director, National Health Mission, Government of Mizoram chuan, “India ram state zingah chhul hmawr cancer vei hi Mizoramah an tam em em a, chuvangin hemi kawng lamah hian hmalak hi a ṭul takzet a, Mizoramah chhul hmawr cancer a bo theihna turin vawiin hian ka theih theihtawp chhuah ka intiam a ni,” a ti a.
Thusawitu dang, Dr. Jeremy L Pautu, Head, Department of Oncology, Mizoram State Cancer Institute leh National Programme for Prevention and Control of Cancer, Diabetes, CVD and Stroke (NPCDCS) State Nodal Officer ni bawk chuan, “Tunah hian Mizoram Sawrkarin chak takin hma a la mek a, chhul hmawr cancer hi cancer zinga vaccine hmanga ven theih awm chhun a nih avangin hmeichhe naupang zawng zawngte’n chhul hmawr cancer vênna an lak vek theih chuan Mizoramah chhul hmawr cancer vei an tlahniam hle dawn a ni” a ti.
Prof. Maqsood Siddiqi, Founder leh Chairman, Cancer Foundation of India leh Chittaranjan National Cancer Institute (Bose Institute ni ta), Kolkata-a hotupa ber ni ṭhin pawhin thusawiin, Cancer Foundation of India chuan he hmalakna pawimawh tak a hlawhtlin theihna tur hian Mizoram Sawrkar chu a ṭha thei ang bera thawhpui a, techinical support pek a inpeih reng a ni tih a sawi bawk.
He webinar-ah hian thusawitu pawimawh tak, khawvel huapa vantlang hriselna lam zir bingna (research) lama hmahruaitu, Dr. Julie L. Torode, Deputy CEO, Union for International Cancer Control, Geneva leh Prof. Neerja Bhatla, Member, Director-General’s Technical Advisory Group on Cervical Cancer Elimination, WHO, Geneva & Unit Head, Department of Obstetrics & Gynaecology, All India Institute of Medical Sciences, New Delhi te pawh an tel a.
Dr. Torode chuan chhul hmawr cancer hi vantlang hriselna atana harsatna thlentu a nih dan leh a ûmbona kawnga WHO hmalak dante a sawi a. Chhul hmawr cancer hi hmuhchhuah hma a nih chuan vên theih leh tihdam theih a ni a, ṭha taka enkawl theih a nih thu sawiin, hemi chungchangah hian Dr. Bhatla, AIIMS chuan screening te, a venna vaccine pekte leh rang taka enkawlna pek zung zung theih dan kawng zawn a pawimawhzia a sawi a. Kum tinin February ni 4 hi World Cancer Day hman ziah a ni a, kumin phei chu thupui atan chhul hmawr cancer hi thlan a nih nghe nghe avangin, he webinar hian awmze thui tak a nei ngei ang, a ti.
He webinar hi Ms. Sutapa Biswas, Co-Founder leh Executive Director, Cancer Foundation of India chuan a kaihhruai a ni.