DIPR: Vawiin khan North Eastern Institute of Ayurveda and Homoeopathy (NEIAH), Shillong leh Directorate of AYUSH, Government of Mizoram tangkawp buatsaih “One Day Workshop on Ayurveda for Public Health” chu Lal Thanhawla Auditorium, Aizawlah hman a ni a. He workshop hi 3rd National Ayurveda Day lawmna chi khat atana hman a ni a. Hetiang programme hi Mizoramah vawi khat hmanna a ni.
He hunah hian Mizoram Governor Shri Kumannam Rajasekharan chu Khuallian niin Pu Lalrinliana Fanai, Commissioner & Secretary chu Khual Zahawm a ni bawk. Mizoram Governor Shri Kumannam Rajasekharan chuan “Mizoram chu ramngaw, thing leh thlai hrang hrang ṭhahnem tak awmna hmun a nih avangin Ayurveda lama hmasawnna atan hmun pawimawh tak a la nih thuai ka beisei a ni” a ti a. “Kum thum liam ta aṭang khan Dhanwantari Jayanti hi National Ayurveda Day-ah a lo puang tawh a, he hunah hian Ayurveda pawimawhna te zir thar i la kan ni tin nuna kan hrisel zawkna’n Ayurveda hi hman ṭangkai ve i tum ang u,” a ti bawk.
Governor chuan AYUSH system hmang hian hriselna lama mithiam kan indaih lohna phuhruk kawngah te, damlo inenkawlna atana ṭangkai damdawi thlai (Medicinal Plants) chin intihhmuh a loneitute tana eizawnna tling a nih theih dan te leh Ayurveda Panchakarma Therapy hmanga zin mi (Tourist) tam tak hip a nih theih dante a tarlang bawk.
He hunah hian Prof. P.K. Goswami, Director, NEIAH, Pu Lalrinliana Fanai, Secretary, Dr OP Gupta, Former Dean, SSUHS, Assam te’n thusawina hun an hmang a. Dr. S. Mara Thansiami, Dy. Director aṭangin Mizorama AYSUH dinhmun tlangpui ngaihthlak a ni a. Dr. Lalkhawngaihi Renthlei, CEO, State Medicinal Plants Board-in lawmthu sawiin hun tawp a hmang bawk.