Khawvel pumin kan buaipui mek Coronavirus vanga hrileng chu India ramah pawh a hre kai zat pung zelin vawiin he thu buatsaih lai thleng hian mi 300 chuang positive an awm tawh a ni. Indian Council for Medical Rresearch, Government of India pawhin rinhleh test-na kaihhruaina thar a chhuah bawk.
Tun Zirtawp zana kaihhruaina thar a tihchhuahah chuan COVID-19 natna langchhuak lo pawh, he natna vei khawih emaw, khawih hlauhthawnawma awmte chu damlo nen an intawk nia a inrinhlelh aṭanga ni 5-na leh ni 14-naah endik tawh tur a ni ang.
Hei bakah hian damdawi ina damlo awm, thawkna lama natna khirh tak nei (khawsik, khuh leh thawk harsa) te, hriselna lama thawktu zingah a natna lanchhuahna ang nei zawng zawng te, an thisen test positive zuite nena inkhawih zinga a natna lanchhuahna ang nei zawng zawngte pawh endik vek tawh tur a ni ang.
He policy thar hian ni 14 kaltaa khawvel ram danga zin lo haw zawng zawngte chu inah chawlhkar hnih an inkhung hrang tur a ni a, COVID-19 natna lanchhuahna ang an nei a nih chuan test bawk tur a ni.
He kaihhruaina thar hi ICMR-in a din, National Task Force chuan a pawmpui tawh a ni.
Kaihhruaina thar angah khi chuan SARS-CoV-2 kai leh kai lo endik theih huang zauh a ni a, mi tam zawk an endik thei tawh dawn a. Test zat leh positive zat pawh pung lehzual thei a ni. Chutih lai chuan Stage-3 kan tih mai, community transmission, he natna veiin tu hnen aṭanga a kai nge ni ang tih a chhui theih tawh lohna stage erawh kan la kai lo niin ICMR Director-General Balram Bhargava chuan a sawi bawk.
Input from Hindustantimes.com